(प्रतिनिधी : सरिता महाजन)
जळगाव : रामेश्वर कॉलनी येथील संत ज्ञानेश्वर विद्यालयात महात्मा ज्योतिबा फुले यांच्या पुण्यतिथीचे औचित्य साधत मुख्याध्यापक मुकेश नाईक यांच्या संकल्पनेतून विद्यार्थ्यांसाठी विशेष एक तास इंग्रजी वाचन उपक्रम राबविण्यात आला.
समाजसुधारक, शिक्षणाचे हक्क सर्वांना मिळवून देण्यासाठी अखंड लढणारे महात्मा फुले यांच्या कार्याची ओळख विद्यार्थ्यांना करून देणे हा या उपक्रमाचा मुख्य हेतू होता.
कार्यक्रमाची सुरुवात ज्योतिबा फुले यांच्या चरित्रातील प्रेरणादायी परिच्छेदांच्या वाचनातून झाली. इयत्ता दहावीतील तरन्नूम मुस्ताक तडवी, रोशन तुषार पाथरवट, तेजस्विनी संभाजी दांडगे, आरोही सतीश सोनार व कावेरी जगदीश पाटील यांनी प्रभावीपणे वाचन सादर केले.
यानंतर विद्यार्थ्यांनी Equality, Education, Justice, Respect यांसारख्या शब्दांचा वापर करून सोपी इंग्रजी वाक्ये तयार केली. Reading Passage Activity व Word Bank Activity अशा गटउपक्रमांतून विद्यार्थ्यांनी उत्स्फूर्त सहभाग नोंदवला.
विद्यार्थ्यांनी महात्मा फुले यांच्या कार्यावर आधारित इंग्रजी परिच्छेदांचे प्रवाही वाचन करून भाषिक कौशल्य प्रदर्शित केले. “Education for All”, “Respect Everyone” अशी संदेशपर इंग्रजी घोषवाक्ये देत फुले विचारांना विद्यार्थ्यांनी अभिवादन केले.
उपशिक्षिका रूपाली आव्हाड यांनी मार्गदर्शन करताना सांगितले, “महात्मा फुले यांनी वंचितांसाठी शिक्षणाचे दरवाजे उघडले. त्यांचे विचार आजही समाजाला दिशा देतात. वाचन उपक्रमांमुळे विद्यार्थ्यांमध्ये जागरूकता आणि भाषिक कौशल्ये दोन्ही विकसित होतात.”
उपक्रमात सर्व शिक्षकांनी सहकार्य केले. विद्यार्थ्यांनी उत्साहाने सहभागी होत इंग्रजी वाचनाच्या माध्यमातून महात्मा ज्योतिबा फुले यांच्या कार्याला विनम्र श्रद्धांजली
अर्पण केली.
