नरडाणा (प्रतिनिधी: राहील देशमुख) स्थानिक स्वराज्य संस्था निवडणुका २०२५ तसेच आगामी सण-उत्सवांच्या पार्श्वभूमीवर अवैध दारू निर्मिती व विक्रीमुळे गुन्हेगारी वाढू नये, यासाठी पोलिसांनी मोहीम हाती घेतली आहे. त्यानुसार नरडाणा पोलीस ठाण्याच्या पथकाने होळ (ता. शिंदखेडा, जि. धुळे) परिसरात गावठी हातभट्टी दारू तयार करणाऱ्या इसमाविरुद्ध प्रभावी कारवाई करत ४६,७०० रुपये किंमतीचा मुद्देमाल जप्त करून नष्ट केला.
दि. २६ नोव्हेंबर २०२५ रोजी सकाळी १० वाजता पोलिसांना मिळालेल्या गोपनीय माहितीनुसार, होळ गावाच्या शिवारातील धरणाकिनारी नामदेव शामराव भिल (रा. होळ, ता. शिंदखेडा) हा स्वतःच्या आर्थिक फायद्यासाठी बेकायदेशीररित्या गावठी हातभट्टीची दारू तयार करून चोरटी विक्रीसाठी साठवून ठेवत असल्याचे समोर आले. त्यानुसार पोलिसांनी सापळा रचत संबंधित स्थळी धाड टाकली आणि आरोपीला शिताफीने पकडले.
तपासात आरोपीकडून २४ प्लास्टिक ड्रमांमध्ये ८४० लिटर वॉश (किंमत ४२,000 रुपये), ३० लिटर तयार गावठी हातभट्टी दारू (किंमत ३,००० रुपये) तसेच दारूनिर्मिती साहित्य (किंमत १,७०० रुपये) असा एकूण ४६,७०० रुपयांचा मुद्देमाल जप्त करण्यात आला. आरोपीविरुद्ध महाराष्ट्र प्रोव्हिबिशन अ‍ॅक्टनुसार गुन्हा दाखल करण्यात आला आहे.
ही कारवाई मा. पोलीस अधीक्षक श्रीकांत धिवरे, मा. अपर पोलीस अधीक्षक अजय देवरे व उपविभागीय पोलीस अधिकारी सुनिल गोसावी यांच्या मार्गदर्शनाखाली करण्यात आली.
कारवाईमध्ये सहाय्यक पोलीस निरीक्षक निलेश मोरे, पोउनि रविंद्र महाले, असई हेमंत पाटील, पोहेकॉ ललीत पाटील, रविंद्र मोराणी, अनारसिंग पवार, योगेश गिते, भरत चव्हाण, पोना भुरा पाटील, पोकॉ अर्पण मोरे, सचिन बागुल, विजय माळी, विनोद कोळी तसेच ग्रेपोसई अजय सोनवणे यांनी सहकार्य केले.
पोलिसांच्या या कारवाईमुळे परिसरातील अवैध दारूधंद्यावर मोठा आळा बसण्याची शक्यता व्यक्त केली जात आहे.
