(जळगाव प्रतिनिधी)
जळगाव शहरातील गोपाळपूरा भागात राहणाऱ्या २२ वर्षीय विवाहितेने राहत्या घराच्या तिसऱ्या मजल्यावर पंख्याला साडीच्या मदतीने गळफास घेऊन आत्महत्या केल्याची धक्कादायक घटना बुधवारी (दि. २९ ऑक्टोबर) दुपारी १२.३० वाजेच्या सुमारास घडली. या घटनेने परिसरात खळबळ उडाली आहे.
मयत विवाहितेचे नाव हेमांगी तुषार अहिरे (वय २२, रा. गोपाळपूरा, जळगाव) असे आहे. हेमांगी या आपल्या पती व सासरच्या मंडळींसह वास्तव्याला होत्या. बुधवारी दुपारी त्या काही कामानिमित्त तिसऱ्या मजल्यावर गेल्या. बराच वेळ खाली न आल्याने सासू वर गेली असता दरवाजा आतून बंद असल्याचे आढळले. खिडकीतून पाहिले असता हेमांगीने साडीच्या मदतीने गळफास घेतल्याचे दिसून आले.
या घटनेनंतर नातेवाईकांनी हंबरडा फोडला असून घरात एकच आरडाओरडा माजला. आत्महत्येचे नेमके कारण अद्याप समजू शकलेले नाही. घटनेची माहिती मिळताच पोलिसांनी घटनास्थळी धाव घेतली.
या प्रकरणी शनीपेठ पोलीस ठाण्यात अकस्मात मृत्यूची नोंद करण्यात आली असून पुढील तपास पोलीस करत आहेत.
