जळगाव (प्रतिनिधी): रामेश्वर कॉलनीतील विशाल उर्फ विक्की रमेश मोची (वय २६) खून प्रकरणातील नऊ महिन्यांपासून फरार असलेल्या आरोपीला अखेर पोलिसांनी अटक केली आहे. आमीन हैदर तडवी (वय २२, रा. हरिविठ्ठलनगर) असे अटक करण्यात आलेल्या संशयिताचे नाव असून, रामानंदनगर पोलिसांनी त्याला ताब्यात घेऊन पुढील कारवाईसाठी जिल्हापेठ पोलिसांच्या स्वाधीन केले आहे.
विशाल मोची हा १७ ऑगस्ट २०२५ रोजी मित्रांसह दीक्षितवाडी येथील महावितरण कार्यालयात वीजपुरवठा खंडित झाल्याची तक्रार देण्यासाठी जात होता. त्यावेळी वाढदिवस साजरा करीत असलेल्या काही संशयितांनी जुन्या वादातून त्याच्यावर हल्ला करून त्याचा खून केला होता. या घटनेनंतर जिल्हापेठ पोलिस ठाण्यात गुन्हा दाखल करण्यात आला होता.
या प्रकरणात यापूर्वीच पाच आरोपींना अटक करण्यात आली होती. मात्र आमीन तडवी हा घटनेनंतर फरार झाला होता. गेल्या नऊ महिन्यांपासून तो पुणे येथे राहत असल्याची माहिती पोलिसांना मिळाली होती.
दरम्यान, आमीन तडवी हा कुटुंबीयांना भेटण्यासाठी जळगावात आल्याची गोपनीय माहिती रामानंदनगर पोलिस ठाण्याचे पोहेकॉ. सुशील चौधरी यांना मिळाली. त्यांनी सुधाकर अंभोरे व सागर देवरे यांच्या मदतीने सापळा रचून त्याला ताब्यात घेतले. त्यानंतर पुढील चौकशीसाठी त्याला जिल्हापेठ पोलिसांच्या स्वाधीन करण्यात आले.
जळगावात येताच पोलिसांनी आरोपीला हेरून अटक केल्याने खून प्रकरणाच्या तपासाला आणखी गती मिळाली आहे.
