सेनगाव (प्रतिनिधी): जिल्ह्यातील वाढते अपघात प्रमाण कमी करण्यासाठी तसेच नागरिकांनी वाहतूक नियमांचे पालन करावे यासाठी हिंगोली जिल्हा वाहतूक शाखा व सेनगाव पोलीस स्टेशन यांच्या वतीने विशेष मोहीम राबविण्यात आली.
मा. पोलीस अधीक्षक डॉ. नीलाभ रोहन तथा अप्पर पोलीस अधीक्षक कमलेश मीना यांच्या मार्गदर्शनाखाली ही संयुक्त कारवाई करण्यात आली. सेनगाव पोलीस स्टेशन हद्दीतील अपघात प्रवण (ब्लॅक स्पॉट) ठिकाणांवर वाहनांची तपासणी करण्यात आली.
रिसोड रोडवरील कोळसा, वटकळी तसेच जिंतूर रोडवरील भानखेडा, हत्ता नाईक टी-पॉईंट, लिंबाळा तांडा टी-पॉईंट या भागांमध्ये विशेष तपासणी मोहीम राबविण्यात आली. यावेळी ओव्हर स्पीडने वाहन चालविणारे, हेल्मेटचा वापर न करणारे तसेच अवैध रेती वाहतूक करणाऱ्या टिप्पर वाहनांवर कारवाई करण्यात आली.
या मोहिमेदरम्यान विविध वाहनांवर एकूण ४८ केसेस करण्यात आल्या असून ६९ हजार रुपयांचा दंड वसूल करण्यात आला.
सदर कारवाई जिल्हा वाहतूक पोलीस निरीक्षक शरद मरे यांच्या नेतृत्वाखाली वाहतूक अमलदार नापोशी संदीप जाधव, पोशी सुखदेव जाधव तसेच सेनगाव पोलीस स्टेशनचे सहाय्यक पोलीस निरीक्षक दीपक मस्के, पोशि संतोष जाधव, पोशि गजानन कुंडकर आणि चालक परमेश्वर क्षीरसागर यांनी संयुक्तरीत्या केली.
