जळगाव (प्रतिनिधी):मेहरूण : उष्णतेने आणि बदलत्या हवामानाने संपूर्ण जग चिंतेत असताना श्री संत ज्ञानेश्वर प्राथमिक व माध्यमिक विद्यालय यांनी पर्यावरण संवर्धनासाठी एक अनोखा आणि प्रेरणादायी उपक्रम हाती घेतला आहे. शैक्षणिक वर्ष 2026-27 पासून शाळेत “सीड बँक” संकल्पना सुरू करण्यात आली असून विद्यार्थ्यांसह नागरिकांमध्येही या उपक्रमाबद्दल उत्साहाचे वातावरण निर्माण झाले आहे.
सध्या आंब्याचा हंगाम सुरू असल्याने “फळ खा, पण बी फेकू नका” असा संदेश देत शाळेने आंब्यासह विविध फळांच्या बिया जमा करण्याची मोहीम सुरू केली आहे. जमा होणाऱ्या बियांपासून भविष्यात मोठ्या प्रमाणावर वृक्षारोपण आणि पर्यावरण संवर्धनाचे उपक्रम राबविण्यात येणार आहेत. विशेष म्हणजे विद्यार्थ्यांमध्ये लहानपणापासूनच निसर्गप्रेम आणि पर्यावरणाची जाणीव निर्माण करण्याचा या उपक्रमामागील मुख्य उद्देश आहे.
शाळेच्या या अभिनव संकल्पनेचे परिसरातून कौतुक होत असून अनेक पालक आणि नागरिकांनीही उपक्रमात सहभागी होण्याची तयारी दर्शवली आहे. “आज जमा होणारी प्रत्येक बी उद्याच्या हरित भविष्यासाठी महत्त्वाची ठरणार आहे,” असे मत मुख्याध्यापक मुकेश सुरेश नाईक यांनी व्यक्त केले. तसेच सर्व नागरिकांनी या पर्यावरणपूरक मोहिमेत सक्रिय सहभाग घ्यावा, असे आवाहनही त्यांनी केले आहे.
