भुसावळ(प्रतिनिधी): शहरात बेकायदेशीररीत्या गावठी कट्टा बाळगणाऱ्या दोन संशयितांना बाजारपेठ पोलिसांनी सापळा रचून अटक केली. आरोपींकडून गावठी पिस्तुल, मॅगझिन व एक जिवंत काडतूस असा सुमारे ४१ हजार रुपयांचा मुद्देमाल जप्त करण्यात आला आहे. या कारवाईमुळे शहरात खळबळ उडाली आहे.
पोलिसांकडून मिळालेल्या माहितीनुसार, १४ मे २०२६ रोजी मध्यरात्री १२:१० वाजेच्या सुमारास शिरपूर-कन्हाळा रोडवरील घोडे पीर बाबा दर्गाच्या मागील मोकळ्या जागेत काही इसम संशयास्पद हालचाली करत असल्याची गुप्त माहिती बाजारपेठ पोलिसांना मिळाली होती. माहितीची खातरजमा झाल्यानंतर पोलिसांनी तत्काळ पथक तयार करून घटनास्थळी धाड टाकली.
यावेळी दोन संशयितांना ताब्यात घेऊन त्यांची झडती घेण्यात आली. झडतीदरम्यान त्यांच्या जवळून लोखंडी गावठी बनावटीचे पिस्तुल, त्याचे मॅगझिन आणि एक जिवंत राऊंड आढळून आला. जप्त करण्यात आलेल्या गावठी पिस्तुलाची किंमत अंदाजे ४० हजार रुपये तर जिवंत काडतुसाची किंमत सुमारे १ हजार रुपये असल्याचे पोलिसांनी सांगितले.
अटक करण्यात आलेल्या आरोपींची नावे असद अली शेख खालीद अली (वय १९, रा. आझाद नगर, बुऱ्हाणपूर, मध्यप्रदेश) आणि मोहम्मद राजीक मोहम्मद आरिफ (रा. मुस्लीम कॉलनी, भुसावळ) अशी आहेत.
ही कारवाई बाजारपेठ पोलीस स्टेशनचे पोलीस निरीक्षक राहुल टी. वाघ यांच्या मार्गदर्शनाखाली करण्यात आली. पोलीस कॉन्स्टेबल जावेद हकीम शाह यांच्या फिर्यादीवरून आरोपींविरुद्ध आर्म अॅक्ट कलम ३/२५ तसेच महाराष्ट्र पोलीस अधिनियम कलम ३७ (१), १३५ अन्वये गुन्हा दाखल करण्यात आला आहे.
या प्रकरणाचा पुढील तपास पोलीस हेड कॉन्स्टेबल कांतीलाल केदारे करीत आहेत. शहरात अवैध शस्त्रे बाळगणाऱ्यांविरोधात यापुढेही कठोर कारवाई सुरू राहणार असल्याचा इशारा पोलिस प्रशासनाने दिला आहे.
