जळगाव (प्रतिनिधी) : ता नशिराबाद येथील खंडेराव मंदिराजवळील खालची आळी परिसरात सोमवारी दुपारी घडलेल्या एका धक्कादायक घटनेत पतीने पत्नीवर कोयत्याने वार करून तिची हत्या केली. या घटनेमुळे परिसरात भीतीचे व दुःखाचे वातावरण निर्माण झाले आहे. पोलिसांनी आरोपी पतीला ताब्यात घेतले असून पुढील तपास सुरू आहे.
पोलिसांनी दिलेल्या माहितीनुसार, मंदाबाई विकास जाधव (वय ३०) आणि त्यांचे पती विकास जगन जाधव (वय ३५) हे मूळचे केकत निंभोरा (ता. जामनेर) येथील रहिवासी आहेत. मोलमजुरीच्या कामानिमित्त ते गेल्या वर्षभरापासून नशिराबाद येथे वास्तव्यास होते.
सोमवारी दुपारी सुमारे दोन वाजेच्या सुमारास पती-पत्नीमध्ये घरगुती कारणावरून वाद झाला. वाद वाढत गेल्याने संतापाच्या भरात विकास जाधव याने घरात असलेल्या कोयत्याने पत्नीवर वार केले. चेहरा आणि मांडीवर गंभीर जखमा झाल्याने मंदाबाई यांचा घटनास्थळीच मृत्यू झाला.
घटनेची माहिती मिळताच पोलिसांनी तातडीने घटनास्थळी धाव घेतली. पोलीस उपअधीक्षक केदार बारबोले तसेच सहाय्यक पोलीस निरीक्षक योगिता नारखेडे यांनी घटनास्थळी भेट देऊन पाहणी केली. परिसरात मोठा पोलीस बंदोबस्त तैनात करण्यात आला होता.
या दाम्पत्याला सात वर्षांचा मोहित नावाचा मुलगा असून आईच्या निधनामुळे त्याच्यावर दुःखाचा डोंगर कोसळला आहे. दरम्यान, आरोपी विकास जाधव याला पोलिसांनी ताब्यात घेतले असून त्याची कसून चौकशी सुरू आहे.
मंदाबाई जाधव यांचा मृतदेह शवविच्छेदनासाठी शासकीय वैद्यकीय महाविद्यालय व रुग्णालय, जळगाव येथे पाठविण्यात आला आहे. या हत्येमागील नेमके कारण काय होते, तसेच कौटुंबिक वादाव्यतिरिक्त अन्य काही कारण होते का, याचा तपास नशिराबाद पोलीस सर्व बाजूंनी करीत आहेत.
