जळगाव (संपादक :रजत शेख)
शहरातील रामेश्वर कॉलनी येथील श्री संत ज्ञानेश्वर प्राथमिक व माध्यमिक विद्यालयामध्ये आज नाताळ सणाऐवजी पूर्व-प्राथमिक व प्राथमिक वर्गातील विद्यार्थ्यांसाठी “भारतीय संस्कृती व संस्कारमूल्य उपक्रम” उत्साहपूर्ण वातावरणात राबविण्यात आला.
कार्यक्रमाची सुरुवात प्रार्थना व दीपप्रज्वलनाने करण्यात आली. चिमुकल्या विद्यार्थ्यांनी बालगीत, कृतीगीत तसेच छोट्या कविता सादर करून कार्यक्रमात रंगत आणली. सत्य, स्वच्छता, आई-वडिलांचा आदर, गुरुजनांचा सन्मान यासारख्या मूल्यांवर आधारित लघुनाट्य, संवाद व गोष्टींच्या माध्यमातून विद्यार्थ्यांना संस्कारांचे महत्त्व समजावून सांगण्यात आले.
विद्यार्थ्यांनी छत्रपती शिवाजी महाराज व विविध संतांच्या चित्रांचे दर्शन घेतले. इयत्ता दुसरीतील विद्यार्थी आदित्य संजय लोहार याने संत गाडगेबाबा यांची भूमिका साकारून सर्वांचे लक्ष वेधून घेतले. पारंपरिक खेळ व आनंददायी उपक्रमांमुळे विद्यार्थ्यांमध्ये विशेष उत्साह पाहायला मिळाला.
मुख्याध्यापक मा. मुकेश नाईक यांनी विद्यार्थ्यांना मार्गदर्शन करताना, चांगल्या सवयी, शिस्त, स्वच्छता व संस्कार हेच खरे सण असल्याचे प्रतिपादन केले.
कार्यक्रमाच्या शेवटी विद्यार्थ्यांनी स्वच्छ राहणे, नीट बोलणे, मोठ्यांचा आदर करणे व अभ्यास मन लावून करण्याचा संकल्प घेतला. हा उपक्रम बालकांच्या सर्वांगीण विकासासाठी अत्यंत उपयुक्त ठरल्याचे मत उपस्थितांनी व्यक्त केले.
कार्यक्रमाचे सूत्रसंचालन करिष्मा वंजारी मॅडम यांनी केले. यावेळी विद्यालयातील सर्व शिक्षक व शिक्षकेतर कर्मचारी उपस्थित होते.
