जळगाव (संपादक : रजत शेख) – शहरातील रामेश्वर कॉलनी येथील संत ज्ञानेश्वर प्राथमिक व माध्यमिक विद्यालयात बालदिनानिमित्त फॅन्सी ड्रेस स्पर्धेचे आयोजन उत्साहात करण्यात आले. विविध वेशभूषांमध्ये सजलेल्या लहानग्यांची उपस्थिती पाहून शाळेचा परिसर उत्साह, आनंद आणि रंगतदार वातावरणाने उजळून निघाला.
दर वर्षीप्रमाणे यंदाची स्पर्धाही विशेष आकर्षण ठरली. विद्यार्थ्यांनी सैनिक, स्वातंत्र्यसेनानी, पोलीस, डॉक्टर, राष्ट्रीय नेते, संत-साहित्य, भारतीय संस्कृती दर्शवणारे पारंपरिक पोशाख, तसेच सामाजिक संदेश देणाऱ्या विविध व्यक्तिरेखा अशा अनेक कल्पक वेशभूषा सादर केल्या. काही विद्यार्थ्यांनी हाताने तयार केलेले चार्ट, संदेश फलक आणि प्रतीकांची मांडणी करून सामाजिक जाणिवा जागृत करण्याचा प्रयत्न केला.
लहान मुलांच्या चेहऱ्यावरील निरागसता, आत्मविश्वास आणि सर्जनशीलता पाहून पालक, शिक्षक आणि उपस्थित प्रेक्षक भारावून गेले. गाव संस्कृतीचे दर्शन घडवणाऱ्या वेशभूषांनीही स्पर्धेला वेगळेच आकर्षण प्राप्त करून दिले.
शाळेच्या शिक्षक व फॅन्सी ड्रेस स्पर्धा समितीने सादरीकरण, वेशभूषेतील कल्पकता, संदेशप्रधानता आणि आत्मविश्वास या निकषांवर विद्यार्थ्यांचे परीक्षण केले. यावेळी शाळेचे मुख्याध्यापक मुकेश नाईक यांनी बालदिनाचे महत्त्व सांगत विद्यार्थ्यांना कल्पकता, संस्कार, देशभक्ती व सामाजिक मूल्ये जपण्याचे आवाहन केले.
कार्यक्रमाचे आयोजन शाळेच्या शिक्षक व कर्मचारीवर्गाने उत्तमरीत्या केले. बालदिनाचा हा उपक्रम मुलांसाठी अविस्मरणीय ठरला.
