जळगाव: (संपादक : रजत शेख)पुन्हा दहशत माजविण्याच्या तयारीत असलेल्या हद्दपार सराईत गुन्हेगारास त्याच्या दोन साथीदारांसह एमआयडीसी पोलिसांनी जेरबंद केले.
संशयितांकडून गावठी कट्टा, जिवंत काडतूस आणि धारदार कोयता जप्त करण्यात आला आहे.
कांचन नगर परिसरातील तेजस दिलीप सोनवणे हा सराईत गुन्हेगार मा. उपविभागीय दंडाधिकारी, जळगाव यांच्या आदेशानुसार दोन वर्षांसाठी जिल्ह्यातून हद्दपार करण्यात आला होता.
मात्र, तो आदेशाचे उल्लंघन करून नेहरू नगर परिसरात आपल्या साथीदारांसह फिरत असल्याची गोपनीय माहिती एमआयडीसी पोलिसांना मिळाली.
या माहितीच्या आधारे पोलीस निरीक्षक बबन आव्हाड यांच्या मार्गदर्शनाखाली गुन्हे शोध पथकाने संदीपनी बॉईज हॉस्टेल परिसरात सापळा रचून तिघांना ताब्यात घेतले.
त्यांची नावे तेजस दिलीप सोनवणे (२५), खुशाल पितांबर सोनार (२१) आणि चेतन पितांबर सोनार (२३) अशी आहेत.
झडती दरम्यान खुशाल सोनारकडून गावठी कट्टा आणि एक जिवंत काडतूस, तर चेतन सोनारकडून धारदार लोखंडी कोयता मिळून आला.
तिघांनाही हत्यारांसह अटक करून एमआयडीसी पोलिस ठाण्यात सीसीटीएनएस क्र. ७४९/२०२५ अन्वये आर्म्स अ‍ॅक्ट ३/२५, ४/२५, महाराष्ट्र पोलीस अधिनियम कलम १४२, ३७(१)(३) सह कलम १३५ आणि भारतीय न्याय संहिता २०२३ चे कलम ३(५) अंतर्गत गुन्हा दाखल करण्यात आला आहे.
सदर आरोपींना न्यायालयात हजर केल्यानंतर तीन दिवसांची पोलीस कोठडी सुनावण्यात आली आहे. या कारवाईत पो.उ.नि. राहुल तायडे, सफौ विजसिंग पाटील, पोह. गणेश शिरसाळे, पोह. प्रमोद लाडवंजारी, पोह. किरण चौधरी, पोकों गणेश ठाकरे, पोकों किरण पाटील, पोकों नितीन ठाकूर, पोकों राहुल घेटे आणि पोकों योगेश घुगे यांनी सहभाग घेतला.
ही कारवाई जळगाव पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक बबन आव्हाड यांच्या मार्गदर्शनाखाली करण्यात आली
